All posts by joelle

Shelly-Ann Fraser-Pryce Pregnant– Fans React (Funny Spoof)

Boardlane TV: Hello viewers! This is Boardlane TV at Longville Plaza in Clarendon getting fan reactions to the recent announcement of Jamaican sprinter Shelly-Ann Fraser-Pryce’s pregnancy. The young sprinter expressed how excited she was about embarking on this new chapter in her life. Let’s see just how excited track fans are about this. Come over here young lady and speak to our viewers on this matter. What do you have to say?

Rachel: (Smiling) Shelly mi noh wrong yuh, my girl! Noh do like Merlene Ottey an buss 50 an noh have wan pickney fi tek care a har inna har ole age. Di medal can tan fi anedda time. God neva gi yuh womb fi tun souvenir! Yuh is a woman an yuh mek fi breed an multiply …soh breed up mi sistren. BREED UP!! Mi dis glad fi know seh yuh husband tool a fix yuh right!

Boardlane TV: Very candid and interesting remarks. Young man you are nodding your head in disagreement. Do you have a problem with her pregnancy announcement?

Peter: (face wrenched): EEDIAT BIZNESS DAT! Mi lose affa Shelly! Bad decision dat star! Shi ago tek belly mash up har career! Shi fi concentrate pan defending di tikle an puddung baby bizness til gold a drip fram all bout har. Di only weight shi fi put aan a di weight a gold roun har neck. Some a dem athletes need dem head check to blurtneet!

The nearby folks in earshot of this comment, responded with vitriol …

Jenine: Yuh fava fawt! Bout bad decision! Di woman beg yuh anyting? Shi did beg yuh mi buy har baby nappy an provide har wid baby formula? Likkle bway, goh chuck off a flat bridge! Dyam mout set like when gas tek up maaga daag!

Lilian (Chimes in): Fi real, my girl. Im a gallang like di girl barrow im hood fi wan night. Di ooman mek har own money an shi deserve a life outside a di whole heapa running. Weh yuh want har fi do?… Wait til har Bio clock run outta battery fi start have pickney? It look like yuh lick yuh head pan concrete noh bway. Coo yuh to! Fayva dem blastid retail fowl.

Boardlane TV (Trying to gain control):  Ok, Ok! It is getting a bit heated here. I think he has heard enough. Let me get another viewpoint for our viewers. What do you have to say, miss?

Blossom (Vexed): Lady, before mi seh anyting mek a dun dah bway yah. (Pointing)  Hey dutty, stinking bway, yuh  mumma shoulda get fi har head check before shi breed an bring a monkey like yuh inna di world! Leave the lady alone and go find wok fi do. An noh Shelly mek yuh hungry!

Boardlane TV: Alright, Alright! Let him be. Go ahead and tell us what you think.

Blossom: Ok mam. All I have to say to Shelly Ann is to memba wi waan di baby fi have a royalty name like dem people ova Henglan’. If is a girl call har, ‘Grace Hie Pryce’ If a wan bway pickney im can name, ‘Guinness Hover Pryce’. An memba fi invite mi to di baby shower since a mi name di pickney! Love yuh shugga!

Boardlane TV: I am sure Shelly will appreciate your clever input. Well done. Sir, what can you add to this discussion?

Jeffery: Congratulations Shelly, baby! Mek a seh someting to di man of di hour. Respect due Mista Pryce! Di whole worl know seh yuh a good bowler cause yuh finally hit di middle stump. Shelly baby! Enjoy motherhood baby doll. An mek sure yuh siddung an mek dat buck toe heal in peace. Nobadda mek it swell up pan yuh. Only ting fi swell up a yuh belly.

Deloris (Adds): Yes! Congratulations Shelly. Madda Hood is a blessing, mi dear. Yuh fi do like Beyoncé an knock out two wan time soh – BRAPS! When dem si two pocket rocket weh look like dem wan anneda a come fuss an second, it ago mad dem pan di track!  Dem head ago spin like gig! Memba mi tell yuh! Two a dem wi waan!

Boardlane TV: Indeed! Indeed! I am going to take one more comment. Go ahead.

Lanette: THANKS BE TO GOD! Shelly mi know dat deh pickney ago grow good cause yuh madda grow yuh good! Jamaica well happy fi get wan Shelly Waterhouse grand baby. All wi a wait pan now a fi VCB husband fi leggo im soljah pan har. Wi need whole heapa grand babies dat can run faas! VCB! A weh yuh a wait pan?! A Breed up time now! Raaeee!!

Boardlane TV: With that said, Boardlane TV is proud to have brought you remarks from the streets her in Clarendon. We certainly had a mix bag but overall, the fans are just as excited as the Pryce family. Until next time, this is Wendy reporting. Have a pleasant day.

© Written by Joelle C. Wright  March 10th, 2017

FBPost3

Books by the author:

A Soh Wi Do It!

A Soh It Goh!

A Soh Dem Gwaan!

 

Hurricane Matthew – Jamaicans react the Day After (Funny Spoof)

Hurricane Matthew was a category 4 threat to the Island of Jamaica causing widespread worry in the nation and those in the diaspora. However, by the time Matthew made landfall in the island, it was downgraded to a Tropical Storm, dropping heavy rains and causing major flooding in some areas. Jamaicans feeling relief that the dodged the worst, took to the streets to make their feelings known about the Hurricane. Boardlane TV was there to capture the comments.

Boardlane TV: Hello viewers! After much talk of a devastating storm to hit Jamaica since Gilbert, Jamaicans on the streets of Kingston had a lot to say about Matthew. First we have a young lady here ready to speak to us. Are you  relieved that the storm did not make the impact it did?

Polly: (Eye brows raised) As if Macchew was any portion a storm. (Kiss teet) From mi hear di weada man a chat bout im a stall a sea mi did know seh im did out deh a cansida if im really waan come tess Jamdung. Bugga ketch im fraid an decide seh im ago galang bout im bizness an lowe wi. Im noh waan none a dis! Jamaica noh back down to no lickle bway!

Boardlane TV: So you were never once afraid that it could have hit the island as predicted?

Polly:  No sah! Mi can spot a fraud a mile away… all when a storm mi know fakers. From mi seet a dilly dally mi know a smaddy Macchew a look fi ramp wid. Im nave a ting a badda im.

Boardlane TV: Ok Miss… thanks to speaking with us. How about you…what is your take on the hurricane not living up to predictions?

Audrey:  Well as a Christian woman I have to give tanks to di Lawd Gad Almighty fi spare wi wance again. An as a God fearing woman who know my Bible, mi was very bex dat dis storm wid a holy name of wan of Jesas disciples decide seh im was gwine bi a masta of destructian. But di Bible did tell wi seh Matthew betray Jesas soh mi noh surprise im did a try come yah wid im ignorance.

Boardlane TV: Not sure I understand you. Matthew betrayed Jesus? It was Judas who did that Ma’am.

Audrey : (Frowns) Well, Judas – Matthew- dem a di same wikid serpent to mi! Storm weh have Bible name mussen behave dem kina way unless dem a traitor to Jehovah! But Maasa Gad show im who more powaful an run im backside fram yah! I SEH GLORY!! GLORY!! GLORY!

Boardlane TV: Ok Madam. It was a pleasure speaking to you. Sir, same question to you.

Jeff: (Angry) Jah know mi fi give tanks seh it neva soh bad but Jesas Gad man, yuh know how much wok mi put in fi tie dung di house pan di foundation? Mi nail up zinc soh til a weak. Mi board up window, door an di outside tielet an nutten but hard rain come yah! Blastid waste a time dis enoh dawta! Mek dem eva tell wi bout noh more starm. I gwine tear out mi b@tty gi dem an tell dem fi suck pan a straw!

Lloydie: (Chiming in) Well mi a give tanks to di Moas High cause Monday mi did fi deh a court fi possession of tings weh noh belang to mi an mi escape judgement.

Boardlane TV: Things like what sir? Elaborate.

Franky: Nutten too tough. Dem hold mi fi wan Suzuki van weh mi have park up a yaad deh. Mi fine it pan Hope Road laas mont. Sayka Matthew dem call aff di court case an mi have anneda mont fi run robot wi ie soh til di lawya dem tell mi come a court. Selassie know mi noh mine how Matthew come stir up tings. (Grinning) A mi bredrin dat. Fi real.

Delcy: (Snaps ) But si yah Gad. Lissen to dis blastid goat mout teef! A same soh if Macchew did come yah an blow dung wi house, yuh woulda teef every blastid ting unda people nose-ole. Macchew shoulda really huff an puff an blow weh di parasite dem like unu outta di country. Blow unu straight a Cuba mek jancrow nyam unu dung deh! Nutten mi hate dan a bare face teef!

Boardlane TV: Wow! That’s harsh! Moving on to another person here who wants to get in on the conversation. Go ahead Miss.

Petra: All mi know is Hurricane Matthew galang same way like mi baby faada. Im always a tell mi im a come fi look bout im pickney dem an when mi get di pickney dem bade up an ready fi dem puppa come fi dem, all now im noh reach. Look fram when disyah hurricane fi come an when yuh tek a stock… im zoops paas wi an gaan a smaddy else yaad. Same way di pickney dem wuklis puppa behave. Dem yah liyad man!! Mi noh inna nutten wid neida Matthew, Mark, John nor Luke!

Boardlane TV: That is an interesting twist on this matter. I don’t think I expected that. Anyway, this lady seems to be upset. What is on your mind, Miss?

Suzette: (Vexed) Mi feel di govament an business people dem scam wi. Goh look dung a MegaMart an si how di whole a di shelve dem wipe clean! Gas station have line long like  Jesas did out deh a serve fish an bread. Di mount a wata weh mi ketch mi nat even waan dem send mi noh wata bill next mont or else an gwine cuss bare klaat! Dem did well an know seh Matthew a saps an neva did a goh  gwaan wid a ting!

Boardlane TV: But you still can use those essentials – can’t you. They should not go to waste.

Suzette: Lady doan mek mi rude to yuh. Mi tek every shilling mi have fi buy soap powda, shuga, milk, hegg, bread, butta an action DVD caah mi tink mi did ago have movie night. Di govament fi tap scam people fi spen money weh dem noh have! Mi noh have a blinking dime to mi name now an nat a breeze blow fi show feet. If di hurricane did come an jus bore wan hole inna mi house tap, at least mi coulda get lickle insurance money fi dat. But nat a blastid ting mi get outta all mi preparation. Mi not too please wid dis a tall. Dem fi tap ramp wid big people. Oh!

Boardlane TV: Well, you heard it heard first on Boardlane TV folk. Certainly some mixed reviews on  Hurricane Matthew’s journey to the island but the country is blessed to be spared the wrath of another hurricane. Until next time, this is Wendy reporting. Have a pleasant day.

Books by the author:

A Soh Wi Do It!

A Soh It Goh!

A Soh Dem Gwaan!

© Written by Joelle C. Wright Oct 4th , 2016

fbpost3

 

Election 2016 – Interview with Jamaicans & Portia Simpson (Funny Spoof

The Jamaica Labour Party was declared the winner of the 2016 general election, after claiming 33 of the 63 constituency seats. With the JLP handing the PNP a stunning defeat, the green party supporters took to the streets to celebrate its massive victory. Boardlane TV was there to capture some candid movements

Boardlane TV: Hello viewers! I am here in the midst of a jubilant crowd of JLP supporters who took to the streets in a sea of green to celebrate their party’s victory. Let me get some reactions from some of the folks here. Miss, please tell our viewers how you feel about the election outcome.

Tracy: (grinning ear to ear) I feel euphoratic today. VERY, VERY EUPHORATIC! I cyaan tell yuh how it feel fi know seh wi get rid a di bad weed dem inna di country and mi naah chat bout Cali-weed eida. It is going to be a very PRESPEROUS road wid Andrew at di control. I am so very, very EUPHORATIC and EXTASTIC!

Boardlane TV: My, my such big words. Thank you so much for your comment. Young man tell us how you are feeling right about now.

Fabian : (Cheering) Up up up SHOWAAAAA to di worl!!! Yes iyah! Di dinosaur era ova yah now. A fi wi time now. Bare young people a tek ova fram di old cruff dem! A prosperity time now and di labourite team tun up LOUD LOUD!! Mi soon can buy oxtail an cow foot again! Di national dish ago mek a come back like di “Badda Badda” Riddim! No more bread an butta! Brap Brap!

Julia: (Cheering along ) Raaaaaay Andrew Holness  gaan clear! Wi sink PNP ship an run Poorsha outta Gordon House to rahtid! It sweet mi!! Wah day mi si how much tousands a people inna orange outta half way tree square dat mi tink PNP did ago run weh wid di election. Weh dem deh now? Matta fact di only orange mi si tideh a wan man a sell some sour orange inna wan wheel barrow. Nat a nedda orange mi si whole day. Weh dem gaan hide?

Delroy: (Chiming in) Mi know a few a dem weh did dress up inna orange ganzi an orange boot goh polling station. Mi waan wan a dem come beg mi money when JLP start mek money run like riva wata!

Boardlane TV: So it sounds like you believe in the promises of the JLP to get rid of personal income tax for everyone who earns $1.5 million or less?

Delroy: How yuh mean? Yah man! I believe dem! Di man pramise wi seh minimum wage fi move from $6000 to $8000 come April 1st. And so help GAD ALMIGHTY – if mi noh get dat deh money weh him promise wi, mi mek sure call a next election an vote out im Blurtnaught! Mi dead serious!

Boardlane TV: I hear you sir. Although you don’t have the power to call an election but I get your point. (Smiles) Moving along…young man, what do you attribute this win by the JLP to most?

Gregory: Simple put- Portia arrogance and haggish behavior like shi market ooman. Imagine Andrew waan debate an shi come a chat bout shi naah debate nohbaddy! Mi haffi seh to miself, what a lickle renkas bright and outta orda. Portia did a gwaan like shi Jesus Christ but shi naah feed di poor people like weh Him woulda do. Shi noh fit fi bi noh PM caah shi mek wan bag a foo-fool decisions an mek poor people pay feet! An di only new industry weh develop unda fi har government was scamming. Scamma mek more money dan business man to brown daag!

Boardlane TV: With that said, what are you looking forward to from your new government?

Gregory: Good question caah I have a list of demands. (Looking into the camera)) Andrew, mek sure yuh buy back Air Jamaica. Wi lang fi di si wi own iron bird a fly inna di sky. If dem waan hole wi airline hostage, sen fi some man fram dung a Garrison Lane. Mek wi deal wid di case fi yuh. Straight! Nex orda fi yuh bredren… mi waan all a di school pickney dem school fee fi FREE soh dat mi baby modda can hop affa mi fenda bout money a mont time. Every blastid minute book an fee fi pay an mi noh have it a r@@s! Blastid ooman soh flipping igging. Deal wid dat fi mi boss.

Roach: (Adds) Mi have a few demands fi mek to lady.

Boardlane TV: Go ahead. What are your demands?

Roach: Pan day wan mi waan Andrew fi investigate Poorsha an fine out how shi value US$20 million an Obama only value 11 million. A wah goh soh? A mussi Peter Phillips maths shi a use fi count up har money! An mi waan Andrew fi deal wid weh a gwaan ova Goat Island. Wi still noh sure if “Lizzard” dead or alive. Investigate dat to. Free up Buju and Kartel! Run weh di Chinese dem an gi wi back wi land! An mek sure di dollar noh slide wan more penny or else a war!

Boardlane TV: On that note, we would like to let our viewers know that we had an opportunity to speak briefly with the ousted Prime Minister just after her concession speech. Here is the footage:

*******************************************************************

Boardlane TV: Prime Minister Simpson, what do you have to say about the resounding defeat your party took in the elections? What went wrong in your opinion?

Portia Simpson: Well, hall I hoff to say that the people hoff Jamaica hoff spoken. I just hope and pray dott the JLP does not wreck the economy I work so hord to build up.

Boardlane TV: But Mrs. Simpson, the people of Jamaica would not agree with you that the economy was on good footing given the every day struggles they faced.

Portia Simpson: Look hear noh Miss, doan draw mi tongue! We have done our best. The foct is, we are not quarrelling with anyone. The people voted for a party that promise them all sorts of things that the JLP cannot deliver and I will be watching to see whot hoppens in a few years because the people will be begging bock for me.

Boardlane TV: So you will be monitoring Andrew Holness carefully? Is that what you are saying?

Portia Simpson: I am not watching any of them over that party. As a woman, I doan watch man. What I am saying is that I am going to see if Andrew can find where money hiding to talk bout him going to reduce taxes and increase wages. I am also going to see if him build a bigger mansion than mines. Yes, I will be watching.

Boardlane TV: Would you like to offer any words of advise to the new PM, Mrs. Simpson?

Portia Simpson: No, not really. It is fi dem cross to bear now. Not mine. But I will reach out to Andrew to borrow back the plane because I still plan to go to Rio for the Olympics. I not paying big plane fare to reach dere. That is all. Have a good day.

Boardlane TV: That is all we have for you today folks. The people have spoken. As Jamaica looks towards a new future, let’s hope the country gets stronger than yesterday. Until next time, this is Wendy reporting. Have a pleasant day.

© Written by Joelle C. Wright Feb 25th , 2016

Books by the author:

A Soh Wi Do It!

A Soh It Goh!

A Soh Dem Gwaan!

FBPost2

 

Portia Calls for an Election – Jamaicans React (Funny Spoof)

In front of thousands of a jubilant crowd of supporters, Prime Minister Portia Simpson announced that Thursday, February 25 is to be the next Election Day. As Jamaicans prepare to head to the polls, passions are rising on both sides of the political spectrum and Boardlane TV is on the streets of Kingston to get reactions from the people.

Boardlane TV: Hello out there! Jamaicans now know when they will go to the polls and I am here in the Half Way Tree Mall getting reactions from a group of people who are already chattering about the election. Let me start with you sir. What are your views of Portia’s chances to be re-elected?

Robert: To tell yuh di troot mi pray seh shi neva return. Is time now wi get a party in powa dat care about Jamaicans. If yuh eva get sick and goh a hospital yuh si weh mi a talk bout. It get soh bad dat nat even fly waan pitch pan dee-dee caah dem noh waan get sick inna dis country. I-man not even sure if di JLP can do any betta. All a dem jus dunce an love dem party ova di people. Mi dun talk!

Melanie: (Rebuts in anger) Maasa tap chat rubbish!!  Look pan all di tings dem weh happen unda PNP watch! Wi have boasy Highways.. everybady own a cyar soh til yuh cyaan fine place fi walk.. Nuff people own mansions pan tap a di hill. Technology a blow up all ova di place! Dung to di lickle baby dem a walk wid cell phone! And look how much gold medal wi win inna Olympics unda Portia watch?  Yuh tink dat jus come soh widout a strong leada?

Robert: (Brushes her off) As mi hear people like yuh open up unu ignorant mout mi dead sure dis a roll call fi di  retarded. Yes ..unu goh ansa to unu masta Mama P  caah unu a fret seh unu naah goh get noh  more oxtail and goat fi unu  blastid  bang gut! Ooman walk off yaah!

Boardlane TV: Ok , Ok! No need for the back and forth arguing. Let me move on. How do you see this election shaping up Miss in the purple blouse?

Dalia: (Looking in the camera) Sit comfortable Portia! Siddung steady gyal because you are going nowhere!

Miriam: (Butts in) But coo yah! Yuh did si how Portia did look tiyad an pap dung laast night? Fi har time EXPIRE! Pooorrsha is time fi step down and goh get a facial scrub. Yuh tiyad!

Boardlane TV: So Miss, are you predicting that the JLP will take over the reign of the government?

Miriam: (Nodding) Yes! I am VERY confident of a victory for the JLP. Mi all hear seh people a farrin a book flight fi come dung fi cast dem vote.  Dem want to mek sure Poorsha an har government get di stepping! The change is coming Jamaica. Unu watch an si!

Boardlane TV: I guess in a few weeks the airports won’t be able to keep up with those flights coming in. Oh dear. Sir, do you agree with her prediction sir? Who will win this election in your opinion?

Collin: (Kiss teet) Lady, a promise is nutten but a comfat to a blastid fool!  Only when election time yuh hear dem a mek all kina pramise weh dem neva gi wi yet. Dis yah govament noh care bout poor people. People muss vote pan di issues an puddung party loyalty. Some a dem PNP  people a sufffa soh til dem noh have strent fi git up outta dem bed. Some a dem maaga dung to nutten ova starvation and yet still dem waan believe dis garbage mi hear Portia a chat pan TV. Right now mi cyaan even kip mi yam an cocoa pan mi farm sayka di dyam teef dem.  When mi a vote mi a vote pan prosperity. Mi naah lissen to noh pramise.  Action speak louder dan words.

Nova: (Agrees) Talk di tings Bredda D! All a dem a tek wi fi puppet. Dem a tell yuh fi vote but yet still yuh noh have noh road.  Mi tiyad fi a buy new slippas caah di bad road dem a tear dem up! Imagine if mi did have a cyar!  Wi noh have noh prapa drainage system. Look how much dutty black wata dout di place. Jamaica tun di land of wood and dutty black wata.  Slackniss dis man! Wi need new leadaship!

Dalia: (Rebuts) Den if yuh a buy hundred dalla slippas weh yuh expect?! Di way how some a unu a talk is like a Portia mek Jamaica poor! Unu neva did poor before shi come inna powa? Well, di JLP did a bawl fi election call soh now di date set. Hope unu ready fi di landslide buss assin dat unu ago get.

Dean: (Laughing jubilantly)  Mek dem tan deh chat bout Portia ago lose sistren! Shi mek a good move caah dem cyaan prepare fi wi inna tree weeks! Nat even T-shut dem can get print inna tree weeks.  Daag ago nyam daag ova Belmont road di mawning  of Feb 26th. Stay tuned!

Boardlane TV: So am I hearing that most people believe Andrew Hollness will have a difficult haul in this election?

Marie: I want to know if Portia can stay in powa fi soh long an shi nuh have noh brains, why Andrew who is a “ROADS” scholar  cyaan run di country?

Dean: (Mocks) Andrew a really “road” scholar fi troot.” Fi im road  slippery an im party  dry up like grass inna hot sun. Wooiii mi belly! Yuh deh yah a try diss di prime minister an a show up how yuh daff an illiterate!

Marie: (Angrily responds) STINK AFF MONGREL! Unu a jump pan di man back like unu know anyting bout im. Di whole a unu friten ova big speech pan podium. Gi di man a chance!

Melanie: (Disagrees) Nat even di Labourites ago gi Andrew noh  chance. Mark mi word.. if im win by di 26th dem kick im out an put in Audley. Andrew a star inna im own duppy show!

Boardlane TV: This is getting really heated on both sides. It seems there is no trust in either party. How do you as voters decide on who is best to lead?

Rohan: Lady, wi coulda complain til wi black and blue nutten naah change. Wi jus haffi tek di lesser of two evils. Trust me it betta wi tap waste time wid dem yah politician an goh vote fi God caah  a only im wan can help wi.  Whole a dem a some parasite! All di teefing Peter Philips behine Portia look like im blastid raw mout a drip sewage wata. Look like im want a blurtnaught bib round him powk neck! A cyaan tek di whole a dem!

Boardlane TV: Oh Dear. Well, we are going to wrap this up now and get a final word in. Anyone wants to close out on this topic?

Princess: (Steps up to the Mike) Unno look here noh! It is in di best interest of the PNP party to win because foreigners are waiting patiently to come here an buy up di land weh poorsha pramise dem. Jamaica a noh fi wi again.  Dem a sell wi out to di highest bidda. Soh all di warring dem people a gwaan wid noh matta. Portia ago win sed way.

Boardlane TV: So there you have it folks. The last word has been spoken. Portia has stated in her speech: “If you want to keep Jamaica moving up, stay with the People’s National Party.” Only time will tell how this will turn out for either party and for Jamaica. Until next time, this is Wendy reporting. Have a pleasant day.

© Written by Joelle C. Wright Feb 2 , 2016

Books by the author:

A Soh Wi Do It!

A Soh It Goh!

A Soh Dem Gwaan!

<<SHARE>> <<COMMENT>><<LIKE>><<SHARE>>

FBPost3

United Kingdom David Cameron offers a Prison to Jamaica – Jamaicans React (Hilarious Spoof)

Prime Minister of United Kingdom (UK) David Cameron official visit to Jamaica has yielded promises of a £25million fund aimed at building a new prison for the island. The news struck a nerve in Jamaicans all across the globe. Boardlane TV is on site at King’s Plaza in Constant Spring to obtain reactions from every day Jamaicans.

Boardlane TV: Sir, please come over here and tell our viewers how you feel about Prime Minister Cameron’s proposition for Jamaica.

Sophia: (Vexed face) Cameron waan smaddy slap im wid a big stone! I swear to Almighty Gad seh Manley, Bustamante, Marcus Garvey, Sam Sharpe a tun inna dem grave yah now and bawl bloody murda! Dung to Nanny mussi a seh shi ketch bullet inna har b@tty fi nutten if a dis wi come aff to. Portia Simpson naah do nutten but sell out Jamaica to di highest bidda!

Rufus: (Interrupts and chimes in) Talk di tings dawta! Mi waan fi know if di Governa General or smaddy cyaan lick some sense inna Portia lagga head?! Betta yet, why dem noh fling har r@ss inna di prison when it dun buil? Shi an di ress a sell out dem a blastid TEEF an criminal! I neva si siting hat mi soh since mi baby madda lef mi an goh deh wid mi uncle. Trus mi.

Boardlane TV: I appreciate your candid comment young man. Ok, I see someone dying to get on camera. What do you have to say to our viewers?

Cockpipe: All Rasta waan fi seh is …Cameron a di real Wasteman! God si an know! Weh Chronixx deh fi talk pan dis? Weh yuh haffi seh now Chronixx or yuh naah goh seh nuuten caah yuh fraid dem tek weh yuh Visa? All di wan Sista P always a chat bout shi noh fraida noh bwoy an noh gyal but when whi fi stan up firm an talk up fi wi, shi lose har big chat an tek dis loada hog sh!t dis man come gi wi. Shi noh have noh bloody use fi di big mout shi have. Cockpipe dun talk!

Boardlane TV: OK sir… I hear you and God knows we don’t want any more Twitter controversy over this visit. Moving right along. Let me your view on the matter. What do you have to say about this, young man?

Jeff: (Shaking head) Afta how much years a slavery – a ongle prison wi get?? Kiss mi neck Jah! Di man cudden come build some museum fi store Portia old-bruck frack and wig dem? Im cudden build more stadiums? Fix up wi bridge, road, school, police station an park?? Im cudden gi wid some fighter plane, marine tank, submarine, night goggles an dem tings deh?

Boardlane TV🙁Confused) Sir, are you expecting Jamaica to get into a war?

Jeff: (Shaking head) Lady, at di rate at which wi a go wi already inna war. When dem sen dem bad man deh dung yah fi put pan tap a di set weh dung yah …wi ago waan all scud missile to blurtneet! A more serious times wi get ready fi goh inna. Memba mi tell yuh!

Gloria: (Chimes in) TV lady, all I want to ask is …what is di education requirements to run for Prime Minister? Becausen seh as a Christian woman, dem someting here ago mek two dutty badwud come out a mi mout and Maasa Gad not going to be please wid mi. Di pickney dem nat even have prapa working teilet inna di school dem and dis stinking government a tek money fi build prison! An who di backside ago feed dem when dem come yah? Mi only hope di govament mek sure Cameron feed dem to caah enough food noh dung here fi share fi soh much people. Portia, yuh si all yuh… as election come a hope opposition light up yuh blood fire!!!

Celia: (Sigh) How soh much a unu unintelligent and dumb people love push up unu self pan TV soh? Unu soun downright trupid , rude and foolish. Why di whole a unu soh nasty gainst Portha Shrimson….a woman dat give soh much service to di country. Di whole a unu a some dutty crow an unu attitude come een like a flat tire going nowhere until unu change it! Unu gwey an hop offa mi PM back and fix unu self!

Devon: (Starts arguing) Dat is why wi country cyaan betta. Yuh cyaan even pronounce di PM name good an deh yah a chat bout people noh intelligent. MOVE and GWEY an goh tell yuh “crime minister” seh Jamaica don’t need noh more prison. What wi need a more mad house fi fling har and di ressa restarded jancrow dem r@ss in deh!

Boardlane TV: (Alarmed) Woaa! Woaa!!Ok, Ok. Calm down folks before things get out of hand here. Take a deep breath. You Miss, what’s your side on this heated discussion going on here?

Debby: Look Miss, some people missing the point. Mista Cameron have the right to deport criminals. A dem wrang fi goh a UK an goh tun criminal. Look how long mi deh yah a try get a Visa fi goh Miami an cyaan get troo and dem goh quite a England gaan en up a prison. Portia fi tap gi criminal VISA an gi dem to people like mi who waan goh farrin goh live betta life. Mi noh wrang Cameron fi tell dem seh dem cyaan stay dere an at least im want to build somewhere fi put dem soh dem noh run wild inna di streets.

Devon: (Starts arguing again) Here dis almshouse argument fram dah big foot gyal yah! Mr Cameron is a slimy goat wid evil intentions! When dem tek up residence a people country, dem need to serve di time weh dem do di crime and tan deh afta dem serve dem time!!…Cameron fi wheel an come again or goh di hell back to Britain …Like dem seh: “Red eye and Lickie Lickie dog all the same. ” Portia too blasted Lickie Lickie an shi need fi goh buy two pound a DIGNITY an one pound a CLASS!

Rose: (Adds) Portia don’t have no vision and shi need Jesas. Shi neven demands dat Cameron pay wi back reparations fi slavery soh mi can get a check fi set up mi house good wid bran new furniture an wan flat screen TV.

Boardlane TV: Madam, reparations are not about people getting a check. Instead reparations could be in the form of debt forgiveness to reduce our debt load and requesting the building of schools, hospitals, and the improvement of existing infrastructure such as roads etc. It’s not about giving individuals payments by check.

Rose: (Disappointed) A true fi real? Den a mek people did a galang soh ova reparations like a sinting good fi poor people. (KMT) Well if a noh money wi a get dem can stuff dat where di sun don’t shine!

Boardlane TV: All right then and on that note we have now concluded our live reactions from very opinionated Jamaicans on the streets of Constant Springs. Until next time, this is Wendy reporting. Have a pleasant day.

© Written by Joelle C. Wright Oct 1, 2015

Books by the author:

A Soh Wi Do It!

A Soh It Goh!

A Soh Dem Gwaan!

Reggae Boyz beats TeamUSA in CONCACAF Gold Cup semifinal – Jamaicans React (Funny Spoof)

USA took on Jamaica’s Reggae Boyz in the CONCACAF Gold Cup semifinal game on July 22nd where Jamaica came out on top with a 2-1 upset over Team USA. The streets have quieted down from the jubilation but the Jamaicans are still basking in the after math of the victory. Boardlane TV is live in Portmore, Jamaica to get reactions.

Boardlane TV: Hello everyone, this is Wendy reporting from Portmore and I am standing next a jubilant supporter of the victorious Jamaican football team. Why don’t you tell our viewers how you are feeling this morning about Wendsday’s game.

Sheldon: (Pumping fist) Watch mi now peeple.. a we seh REGGAE BOYZ goh a farrin an drive di blurtneet GREEN bus inna di fuss half and den park wan big duty YELLOW truck inna di second half and den BLACK out di US team to bombawt! (Yells) GREEN, YELLOW AN BLACK TO DI FLIPPING WOLRD WI SEH!!

Boardlane TV: Wow! What a way to put it. So who impressed you the most in the game?

Sheldon: All a dem perform pan tap shelf level, sistren. Truss mi… if dem neva preform dem way deh.. wi bruck dem foot as dem step pan Jamdung soil. Wi noh tek buss assin fram USA lightly soh caah a wi fi run football pan dem yute deh. Weh dem know bout football like wi? Big up to di man Mr. Schafer. Nuff respect! Di old white head man slew dem to bombeet!

Boardlane TV: I thank you for your comments. Nicely done. Miss, come here and give our viewers your take on team Jamaica’s victory.

Merna: (Yawns) Excuse mi fi yawn lady but mi neva sleep too good laas night. A roun 9 aclack inna di night mi get call fram mi bredda fram quite a Hinglan a hosk if mi if mi si how Jamaica beat up USA inna football match. Troo mi use to di blastid, wuklis bway dem always a fling weh di game dem mi neva set up fi watch it. Soh mi jump outta mi bed sed time an ask him: “A serious medz or a joke binzness dis??” Lowe an behold a true sinting to kackafawt!

Boardlane TV: Yes, it is indeed true. So have you celebrated with friends since you got the news?

Merna: Well, mi neva do nutten much fi celebrate odda dan as mawning light mi git up outta mi bed and start mek some “Reggae Boyz” grater cake fi sell. Yuh know how dem Jamaicans yah wi buy anyting now weh seh “Reggae Boyz.” Any adda day dem bruck an pauperish but mi know tideh dem a fine money fi buy any old fawt caah dem inna good mood. Money haffi mek tideh.

Boardlane TV: I hear you. Moving right along. Young man you are true patriot decked out in your Reggae Boyz jersey with the number 11. Tell us the significance of your support for number 11.

Bruce: Well lady I am a big supporta of numba 11, Darren Mattocks. Wi use to call im “Natty Matty”. Mi a falla im fram di time im deh pan di Portmore United football squad an mi glad seh a im put wi up one love inna di game. When mi si “Natty Matty” goh soh an flick in a heada inna di goal mi head start raise like duppy tek set in deh to rahtid!

Boardlane TV: Explain that. Head raised?

Bruce: Yah man! When people seh dem head raise dat mean dem feel proud. (Puzzled) A weh yuh come fram? A farrin TV station dis mek yuh know dat?

Boardlane TV: (Smiles) Just wanted you to clarify for the viewers so they don’t think you became daemon possessed. Let me hear from this other gentleman. How do you feel about how team Jamaica represented?

Dillon: (Excited) Wiked match!!Match noiceee!!! A maddd ting!! Up up up way up!!!!!! Straight up like 7up! A wi seh wi team swaggerific and terrific! Wi shell dung an tun up til wi buck!! Wi goh deh fi drink milk wi noh goh deh fi count cow! A werk wi werk…wi noh come fi jerk!

Rohan: (Laughing) But a bare slang disyah bway deh pan like im an Elephant man a fuss cousin. Mek I ansa di question yaah lady.

Boardlane TV: Go right ahead.

Rohan: A soh dem shoulda a gwaan long time. Last year di Jamaica team neva did a gwaan wid nutten! Dem did look soh blastid bad dat mi a wanda why dem neva recruit some ooman fi play fi di team. But fram mi si di performance wid dem an Argentina coming down, mi know di man dem annoh buck up dis time. After all dese years wi finally bus USA ass! Tank yuh Faada!

Boardlane TV: Good stuff. Come here young lady, you are just dying to say something. Speak to me. What’s on your mind?

Juliet: (twirling her long weave) Would you marry me number 17, Rodolph Austin? Would you be my one and only baby daddy? And if yuh seh no .. can yuh get di goalie numba fi mi? Im body tun up an look trang deh dowe!

Otis: (Steps in annoyed) Sweetheart, do you even watch football? Goh wan side an tek weh yuh blastid cunnu-munu self affa di people dem TV statian! Blinking nuff like powda puff!

Boardlane TV: Ok sir why dot you close out the interview for us.

Otis: (Grabs the mike) All mi haffi seh dis mawning is dem did seh wi was di under dog. Under dog like unu PUPPA! Mi si all a man a di game a wear Barcelona shut like im did deh a look fi Messi. KMT. Unu noh a gwaan like unu noh rate wi but Reggae Boyz buss up head and buss up net! Who did doubt wi an jump ship .. unu si seh di ship still a sail. Goh tell every man an woman, young an old seh di Red White an Blue juss get dem ass whoop by di Black Green an Gold! Mi dun talk! (Drops Mike)

Boardlane TV: Oh Jesus, did you just drop the expensive mike on the ground sir?

Otis: (Picks up the mike fast) Sarry! Hush! Mi did get too excited. If it expensive it noh suppose to mash up. Seet deh it still a carry sound.

Boardlane TV: Anyway folks! It was a pleasure bring ng you live reactions from proud Jamaicans on the streets of Portmore. Until next time this is Wendy reporting. Have a pleasant day.

© Written by Joelle C. Wright July23rd, 2015

Books by the author:

A Soh Wi Do It!

A Soh It Goh!

A Soh Dem Gwaan!

 

Jamaicans Prepare for President Obama’s Visit (Funny Spoof)

Portia Simpson Miller announced that President Obama will pay a state visit to Jamaica on April 9th en route to Panama. BOARDLANE TV wanted to solicit some insights from Jamaicans on the streets on just how much the visit will mean to them.

Boardlane TV: Hello viewers. With news of a sitting US president to visit the island since Ronald Reagan, we are here in Montego Bay feeling the pulse of Jamaicans in anticipation of his visit. Standing with me is a school girl who says she is a fan of the US President. Go ahead and tell us  what do you think of this visit?

Tricia: (Excited) Hello Miss, mi cyaan  believe seh Mista Obama a come a wi lickle Jamaica! Dis feel to mi like when mummy introduce mi to mi daddy fi di fuss time, mi naah lie. Mi love meeting strangers yuh si. Anyway, Mista President do mi a beg yuh stap a Mo’bay before yuh goh a Gordon house sar. Mi waan ketch a glimpse a yuh an si if a soh yuh really look good-up an frass like how mi si yuh pan TV.

Sadie: (Interrupts) Yes Barack! Come a Mobay fuss soh wi can gi yuh some roast yam an saltfish fi nyam. It look like di wan Michelle put yuh pan so-so lettuce leaf diet. Wi noh like how look draw dung an fayvah when daag a set fi dead. Yuh naah lef Jamaica til wi buff yuh up soh yuh can full out yuh suit dem good an prapa. Muah! Wi love yuh to di max Barack!

Boardlane TV: (Smiles) Very cute. Thanks.. now I’m going to talk to this  T-shirt street vendor over here. Hello madam.. how do you feel about President Obama’s visit next month?

Rhoda: (Shocked) Kiss mi mumma tripe! A lie! ‘Bama a come a Jamaica?!!

Boardlane TV: Yes ma’am, in April. You didn’t hear about it?

Rhoda: No baby love! A weh di puss tail yuh a seh to mi! Excuse mi deh lickle …mi have a phone cawl fi mek  (She dials a number on her cell phone) Dutty gyal Marva!  A mi Rhoda… gyal wan ooman weh deh yah a interview mi fi TV seh Michelle Obama baby daddy a come a yaad! Misiss beg yuh put mi inna yuh book deh. Mi a come ova Satiday mawning fi put in 4 track inna mi head. Mi haffi look bash fi mi President. By di way Marva, mi money  ago shart when mi come.. but mi wi pay yuh when mi sell di nex quarta dozen t-shut, yuh  hear mums? Layta!

Boardlane TV: I see you are very excited but why do you want to get dolled up for the President… you may not even get a chance to see him since he will be in Kingston.

Rhoda: Yuh tan deh tink soh! If mi haffi boom a ride pan wan handcart fi reach Kingston fi goh si dat deh scrumptious man, a dat mi ago do. (Kiss teet) Excuse mi lickle caah mi haffi goh ketch Missa Chin shap fi buy some blue, red an white hair. Yuh luckia dan mi. .. (Pushing away the Mike) Beg yuh paas.

Mikey: (Puffing on a cigarette) Miss lady, a soh some a dem dunce gyal yah love galang like some blinking pappy show like dem tink Obama a come a Jamaica fi kin im teet an goh a beach wid dem.  Mi suspek seh  all im a come yah fah, is fi si if di yute dem dung yah a link up wid ISIS and ALKIDA. Noh troo yuh si mi noh have my diploma, mi noh know what a gwaan. Dem check seh big man a fool!

Boardlane TV: Sir, I do believe the President’s visit has nothing to do with terrorist organizations. He is planning on meeting with the PM to talk about security, trade and other topics, sir.

Clifford:  (chimes in) Yow TV lady! Lowe mi  bredrin mek im talk di tings straight! Di man a come dung yah fi pree some tings weh noh too level. Yuh si mi? When Obama siddung wid Portia all mi want im fi do is fi negotiate di release of Dudus, Kartel, Buju an dem man deh, zeen? A dem deh kina trade agreement wi deh pan. Memba mi tell yuh dat!

Boardlane TV: Young man, I highly doubt any of those talks will go down with the Prime Minister.. but thanks  for the remarks anyway. Let me move on. You leaning against the post, do you have any expectations for the President’s visit?

Dennis: (wrenched face) Which President yuh a talk bout, sistren?

Boardlane TV: Aaah…the President of the Unites States, Barack Obama, sir.  He will be here on April 9th.

Dennis: BOMBAWT!!! ‘Bama a fly dung fi real?! Well, im can gas up Air Force one an fawud still. But mi ago miss di whole ting caah I-man have a court date pan di sed day fi a weed charge, yuh noh seet. As yuh a talk bout dat, if ‘Bama naah come fi support Jamaica an buy up some a wi good high-grade an leggo some money inna wi country, a waste a time visit still. Nuff place a farrin legalize di herb soh im betta come prappa wid some dallaz line up fi di good sensie. Yuh si mi?

Boardlane TV: If you say so. Again, thanks for your comments. Hello Miss in the jeans skirt. Do you agree that the President’s visit could be a waste of time if not to negotiate on marijuana? How do you feel about this?

Lacy:  (Frowns) I doan care wedda im want to come here or what im coming here fah. I jus cancern dat Portia need fi tidy up di place before shi invite good people to wi yaad. When yuh a invite stoosh people a yuh yaad, doan yuh suppose to mek sure di place noh look chacka-chacka an smell rancid? Di garbage waan pick up an dem fi out di fiyah ova Riverton. Dem cyaan have di man a fly troo black smoke. Suppose im choke up inna di air?  And let’s say far instance di man goh drap inna pothole ..how dat ago look? Jesas man.. di place waan freshen up before shi chat bout shi a bring in Obama. Im noh use to di nastiness!  A noh soh di man grow! Dat is slackniss!

Boardlane TV: Wow. Interesting.  Thanks. Come here sweetie, looks like you want to add to what she said. Speak into the mike.

Karlene: (chimes in) Yes mam..shi speaking di troot. An ‘part fram di pot hole dem ..supposen seh light goh lack aff pan di poor man when im deh yah?! A soh Portia ago mek im siddung inna pitch black a count peenie wallie?  All di same.. im fi si dese tings soh im can know dat Jamaica is nat all paradise an glory. Fawt if dem eva know di real story an goh put ie pan CNN and FOXNEWS! What a sinting wi woulda behole dung yah to rahtid!

Boardlane TV: You both have some good points there. Lastly, you in the green blouse with “JLP” written on it. You seem to be someone who is political. What do you have to say?

Jackie: (Speaks into the camera) Well, yes I support the Jamaica Labor Party and I would like to send greetings to the President from Mobay. I would also like fi hosk im, if afta im  lef di white house, if im can come dung here an  run fi Prime Minister?

Boardlane TV: (puzzled) You know that is not possible, right?

Jackie: (Rolls her eyes) Look yah noh…. anyting is passible when yuh pray to Almighty Gad! Di only reason mi wudden want im fi come dung yah a run di country is if im is PNP an cumunjin like Portia. Odda dan dat im fi really look into it. Wi need nuff help dung yah bad caah di eediat dem weh a run JLP noh wort di pot weh dem p!ss inna neida!

Boardlane TV: Ok I see. You guys have been amazing in your responses. Well folks we have heard it all today – those in support and those not so keen on the idea of the President’s visit. That is going to be it for now until next time. This is Wendy reporting live from Montego Bay. Have a pleasant day.

© Written by Joelle C. Wright March20th 2015

Books by the author:

A Soh Wi Do It!

A Soh It Goh!

A Soh Dem Gwaan!”

For more laughs, visit: http://www.ackeepodpublishing.com/category/parodies/

  • ▬▬▬ LIKE ♥ SHARE  ♥ COMMENT  ▬▬▬●